Pavel Durov beynəlxalq axtarışa verilib

Rusiyanın Federal Təhlükəsizlik Xidməti (FSB) Telegram messencerinin yaradıcısı Pavel Durovun terror fəaliyyətinə yardım ittihamı ilə beynəlxalq axtarışa verildiyini açıqlayıb.

Ajans.az FSB-nin İctimaiyyətlə Əlaqələr Mərkəzinə istinadən xəbər verir ki, Durova qarşı Rusiya Cinayət Məcəlləsinin 205.1-ci maddəsinin 1.1-ci hissəsi ("terror fəaliyyətinə yardım") üzrə cinayət işi açılıb. Bildirilir ki, o, bu iş çərçivəsində beynəlxalq axtarışa verilib.

Xidmət iddia edir ki, Telegram administrasiyası Ukrayna kəşfiyyat orqanları, eləcə də terrorçu və ekstremist təşkilatlar tərəfindən Rusiyada təxribat, terror aktları, kütləvi qətllər və digər cinayətlərin planlaşdırılması və əlaqələndirilməsi üçün istifadə olunduğu bildirilən kanalları, çatları və botları silməyib.

Bundan əvvəl "Rossiyskaya Gazeta" və "Komsomolskaya Pravda" FSB materiallarına istinadən Durovun fəaliyyətinin terrorçuluğa yardım üzrə aparılan istintaq çərçivəsində araşdırıldığını yazmışdı. Həmin məlumatlarda qeyd olunurdu ki, 2022-ci ildən bəri Telegram vasitəsilə 153 mindən çox cinayət törədilib, onlardan 33 mini terrorizm, təxribat və ekstremizmlə bağlı olub. FSB həmçinin platforma vasitəsilə planlaşdırıldığı iddia edilən 475 terror aktının qarşısının alındığını bildirir.

Forbes jurnalının 2026-cı il reytinqinə əsasən, Pavel Durov 6,6 milyard dollar sərvətlə Rusiyanın ən varlı 155 iş adamı arasında 30-cu yerdə qərarlaşıb.

Durov isə daha əvvəl Telegram kanalında paylaşdığı açıqlamada Rusiya hakimiyyətini platformaya çıxışı məhdudlaşdırmağa çalışmaqda ittiham edib.

"Hakimiyyət hər gün rusiyalıların Telegram-a çıxışını məhdudlaşdırmaq üçün yeni bəhanələr uydurur, məxfilik və söz azadlığı hüququnu boğmağa çalışır. Öz xalqından qorxan dövlət acınacaqlı mənzərədir", – deyə o bildirib.