Almaniyada minlərlə işçi ETİRAZ EDİR

Tagesschau xəbər portalının məlumatına görə, etiraz aksiyası IG Metall sənaye həmkarlar ittifaqı və Nekkarsulmdakı Audi zavodunun işçilər şurası tərəfindən zavodun girişində təşkil olunub.

Ajans.az xarici mediaya istinadən xəbər verir ki, iyul ayında keçirilən ikinci etiraz aksiyası olub. Ayın əvvəlində baş tutan ilk aksiyada yalnız həmkarlar ittifaqının nümayəndələri və gənc işçilər iştirak edirdi. İyulun 29-da keçirilən son aksiyaya isə təxminən 6 min nəfər qatılıb.

Mitinqdə IG Metall-ın Baden-Vürtemberq üzrə rəhbəri Barbara Reş, Nekkarsulm şəhərinin meri Şteffen Hertviq və əyalət parlamentinin prezidenti Tomas Ştrobl çıxış ediblər.

Barbara Reş işçilərin hüquqlarını müdafiə etmək üçün mübarizəni davam etdirməyə hazır olduqlarını bildirib və gələcək etiraz aksiyalarını istisna etməyib. Bununla yanaşı, o, rəhbərliklə konstruktiv danışıqların mümkün olacağına ümid etdiyini vurğulayıb. Reş qeyd edib ki, son vaxtlara qədər şirkət rəhbərliyi planları barədə kifayət qədər konkret və şəffaf məlumat verməyib, həmkarlar ittifaqı isə əksər məlumatları mediadan əldə edib.

Aksiyada təkcə Audi işçiləri deyil, həmçinin Porsche və Mercedes şirkətlərinin əməkdaşları da iştirak ediblər. Etirazçılar "Tətil olmadan heç nə dəyişməyəcək!" şüarları səsləndirib, zavodun gələcəyi ilə bağlı aydın plan tələb ediblər.

Hazırda Nekkarsulm zavodunda çalışan işçilər üçün 2034-cü ilədək məşğulluq zəmanəti qüvvədə olsa da, burada istehsal olunan Audi A5 və A6 modellərinin buraxılışının həmin dövrdə başa çatacağı gözlənilir. Bundan sonrakı istehsal proqramı və zavodun taleyi isə hələ açıqlanmayıb.

Xatırladaq ki, Volkswagen daha əvvəl 2030-cu ilədək Almaniyadakı müəssisələrində ümumilikdə 50 min iş yerini ixtisar etməyi planlaşdırdığını bəyan edib. Bu ixtisarların 35 mini şirkətin əsas brendinə, qalan hissəsi isə Audi və Porsche kimi törəmə müəssisələrə aid olacaq. Artıq 37 mindən çox əməkdaş müvafiq razılaşmaları imzalayıb.

Bundan əlavə, xərclərin azaldılması proqramı çərçivəsində daha 50 min iş yerinin və dörd zavodun fəaliyyətinin risk altına düşə biləcəyi bildirilir. Nekkarsulm zavodunun gələcəyi ilə bağlı mühüm qərarın Volkswagen-in Müşahidə Şurasının sentyabrın 4-də keçiriləcək iclasında müzakirə olunacağı gözlənilir.