WhatsApp-da hər şeyi dəyişəcək YENİLİKLƏR

WhatsApp istifadəçi təcrübəsini daha da təkmilləşdirmək məqsədilə bir sıra yeni funksiyaları özündə birləşdirən geniş yeniləmə paketini təqdim edib.

Ajans.az xəbər verir ki, yeniliklər arasında iPad-də telefona qoşulmadan yeni hesab yaratmaq, PDF sənədlərini yükləmədən birbaşa redaktə etmək, Android Auto və Apple CarPlay üçün təkmilləşdirilmiş dəstək, eləcə də statuslara musiqi əlavə etmək imkanı yer alır.

Şirkətin bildirdiyinə görə, uzun müddətdir gözlənilən iPad yeniliyi istifadəçilərə planşet vasitəsilə tam müstəqil şəkildə WhatsApp hesabı yaratmağa imkan verir. Əvvəllər bunun üçün smartfonla əlaqələndirmə və ya veb versiyadan istifadə tələb olunurdu.

Yeniləmə həmçinin brauzer üzərindən PDF fayllarını əlavə proqram yükləmədən redaktə etməyə, avtomobildə Android Auto və Apple CarPlay sistemləri vasitəsilə daha rahat istifadə imkanına, eləcə də status paylaşımlarına musiqi əlavə etməyə şərait yaradır.

Meta bildirib ki, yeni funksiyalar mərhələli şəkildə istifadəyə verilir. Bu səbəbdən yeniliklər ilk mərhələdə yalnız məhdud sayda istifadəçi üçün əlçatan olacaq, daha sonra isə bütün istifadəçilərə təqdim ediləcək.