Bu ölkədə rus kəndləri DAĞIDILIR

Tayland hakimiyyəti İndoneziyanın Bali adasında tətbiq olunan təcrübəni əsas götürərək "rus kəndləri" adlandırılan yaşayış komplekslərinə qarşı genişmiqyaslı əməliyyata başlayıb.Tayland hakimiyyəti İndoneziyanın Bali adasında tətbiq olunan təcrübəni əsas götürərək "rus kəndləri" adlandırılan yaşayış komplekslərinə qarşı genişmiqyaslı əməliyyata başlayıb.

Ajans.az xəbər verir ki, bu barədə The Nation nəşri məlumat yayıb.

Çonburi əyalətində polis lüks daşınmaz əmlak layihələrində mümkün qanun pozuntuları ilə bağlı aparılan istintaq çərçivəsində dörd Rusiya vətəndaşını saxlayıb.

Əməliyyat zamanı 41 ünvanda axtarış aparılıb, qeydiyyat sənədləri, mühasibat qeydləri, kompüterlər və mobil telefonlar müsadirə edilib.

İstintaqın əhatə etdiyi yaşayış komplekslərinin ümumi dəyərinin təxminən 154 milyon dollar olduğu bildirilir. Bu layihələr "Rus kəndləri" adı ilə reklam edilib. Hüquq-mühafizə orqanları Tayland vətəndaşlarının xarici investorların maraqlarını gizlətmək üçün nominal səhmdar kimi istifadə olunub-olunmadığını araşdırır. Məqsədin isə torpaq mülkiyyəti və biznes fəaliyyəti ilə bağlı qanunvericilikdəki məhdudiyyətləri aşmaq olduğu ehtimal edilir.

Polisin məlumatına əsasən, beş yaşayış kompleksində yerləşən təxminən 775 evin idarə olunması üçün 495-dən çox şirkət qeydiyyata alınıb. Onlardan 435-i xarici səhmdarlarla əlaqəlidir. Hazırda 33 şirkətin fəaliyyəti araşdırılır. İstintaqın ilkin nəticələrinə görə, 19 şirkətdə nominal Tayland səhmdarlarından istifadə edildiyi, 14 şirkətdə isə xarici mülkiyyətlə bağlı qanuni məhdudiyyətlərin pozulduğu ehtimal olunur.

Bundan əlavə, 186 şirkətdə səhmdar kimi qeydiyyatda olan iki Tayland mühasibinin fəaliyyəti də yoxlanılır. Müstəntiqlər onların səhmlərə öz vəsaitləri hesabına sahib olduqlarını, yoxsa xarici vətəndaşların adından formal səhmdar kimi çıxış etdiklərini müəyyənləşdirməyə çalışırlar.

Nəşrin yazdığına görə, Çonburidə aparılan istintaq əcnəbilərin torpaq sahibi olmasına və müəyyən biznes sahələrində fəaliyyət göstərməsinə qoyulan məhdudiyyətləri nominal səhmdarlar vasitəsilə aşmaq cəhdlərinə qarşı ölkə üzrə başladılan kampaniyanın tərkib hissəsidir. Polis araşdırmaların genişləndiriləcəyini açıqlayıb.

Oxşar tədbirlər daha əvvəl İndoneziyanın Bali adasında da həyata keçirilib. Adanın qubernatoru İ Vayan Koster bildirmişdi ki, Rusiya və Ukrayna vətəndaşlarının sıx məskunlaşdığı və qeyri-rəsmi şəkildə "rus" və "ukraynalı" kəndləri adlandırılan yaşayış məntəqələri ləğv edilib.

Onun sözlərinə görə, əcnəbilər adada aktiv şəkildə daşınmaz əmlaka investisiya yatırır və biznes qururlar. Lakin bu tip yaşayış məntəqələri Bali adasının yerli qanunvericiliyinə və mədəni siyasətinə uyğun gəlmir. Yoxlamalardan sonra qeydiyyatsız obyektlər bağlanıb, torpaq istifadəsi və villaların icarəsinə nəzarət gücləndirilib.

2024-cü ilin sonunda Bali polisi yerli medianın "rus kəndi"nin yaradıcısı adlandırdığı PARQ Ubud yaşayış kompleksinin təsisçisi Andrey Freyi də saxlayıb. İstintaqın versiyasına görə, kompleks kənd təsərrüfatı təyinatlı torpaqlarda qanun pozuntuları ilə inşa edilib.

Son illərdə Bali hakimiyyəti əcnəbilərlə bağlı miqrasiya nəzarətini də sərtləşdirib. Rusiya vətəndaşlarının deportasiya edilməsinin əsas səbəbləri arasında qanunsuz əmək fəaliyyəti, lazımi icazələr olmadan bizneslə məşğul olmaq və yaşayış qaydalarının pozulması göstərilir.