Alimlərdən şok kəşf: Uşaqlarda...

Uşaqlarda qidalanma çatışmazlığı və boy artımının ləngiməsi ilə əlaqəli bəzi bağırsaq bakteriyalarının anadan övlada ötürülə və inkişaf prosesinə hələ doğuşdan əvvəl təsir göstərə biləcəyi müəyyən edilib.

Ajans.az xəbər verir ki, bu nəticə Sent-Luisdəki Vaşinqton Universitetinin Tibb Məktəbinin alimləri tərəfindən aparılan və Nature Microbiology jurnalında dərc olunan araşdırmada təqdim olunub.

Tədqiqat zamanı müəyyən edilib ki, nazik bağırsaqda yaşayan bəzi mikroorqanizmlər iltihabı gücləndirə, bağırsaq divarını zədələyə və orqanizmin qida maddələrini mənimsəmə qabiliyyətini zəiflədə bilər.

Alimlər araşdırmada ətraf mühit enterik disfunksiyası (Environmental Enteric Dysfunction – EED) adlanan xəstəliyə diqqət yetiriblər. Bu xroniki iltihabi vəziyyət əsasən qidalanma çatışmazlığından əziyyət çəkən uşaqlarda müşahidə olunur və böyümənin ləngiməsi, immun sisteminin zəifləməsi, eləcə də idrak inkişafının pozulması ilə əlaqələndirilir.

Tədqiqat çərçivəsində Banqladeşdə standart müalicəyə baxmayaraq sağalmayan uşaqlardan götürülmüş bağırsaq bakteriyaları analiz edilib. Alimlər əvvəllər iltihab və inkişaf geriliyi ilə əlaqəli olduğu müəyyən edilmiş 14 bakteriya növünü laboratoriya siçanlarına köçürüblər.

Nəticədə həmin siçanlarda uşaqlarda müşahidə olunan əlamətlərə bənzər simptomlar – inkişaf geriliyi, iltihabi dəyişikliklər və bağırsaq toxumasının zədələnməsi qeydə alınıb.

Araşdırmanın ən diqqətçəkən nəticələrindən biri isə bakteriyaların təsirinin hələ ana bətnində başladığının müəyyən edilməsi olub. Tədqiqatçılar hamilə siçanlar üzərində apardıqları təcrübələr zamanı ananın bağırsaq mikrobiomunun dölün inkişafına təsir göstərə bildiyini aşkar ediblər.

Araşdırmanın rəhbəri doktor Cefri Qordon bildirib ki, bağırsaq mikrobiomunun təsiri yalnız ana ilə məhdudlaşmır, inkişaf edən dölün sağlamlığına da təsir edə bilər.

Alimlərin diqqət çəkdiyi bakteriyalardan biri də insan ağız boşluğunda geniş yayılmış Campylobacter concisus olub. Mütəxəssislərin sözlərinə görə, bu bakteriya ağızda təhlükəsiz hesab edilsə də, nazik bağırsağa keçdikdə iltihab yarada və patogen xüsusiyyətlər qazana bilər.

Bununla yanaşı, tədqiqat göstərib ki, bakteriyanın təsiri təkcə onun özündən deyil, ümumi bağırsaq mikrobiomunun tərkibindən və ətraf mühit amillərindən də asılıdır.

Tədqiqatçılar hesab edirlər ki, əldə olunan nəticələr qidalanma çatışmazlığının nəsildən-nəslə ötürülməsi mexanizmini daha yaxşı anlamağa və gələcəkdə hamiləlikdən əvvəl və ya hamiləlik dövründə anaların bağırsaq mikrobiomunun təhlükəsiz şəkildə tənzimlənməsi üçün yeni müalicə üsullarının hazırlanmasına kömək edə bilər.