Pedofiliya ittihamları fonunda məşhur reperin konsertləri LƏĞV EDİLİB
Reper Oxxxymiron (əsl adı Miron Fedorov) ilə bağlı pedofiliya iddiaları fonunda onun Böyük Britaniya və İrlandiyada keçirilməsi planlaşdırılan konsertləri ləğv edilib.
Ajans.az SHOT Telegram kanalına istinadən xəbər verir ki, Rusiyanın Ədliyyə Nazirliyi tərəfindən "xarici agent" kimi qeydiyyata alınmış sənətçinin Avropa turnesi çərçivəsində sentyabr ayında Dublin və London şəhərlərində keçirilməsi nəzərdə tutulan konsertlər baş tutmayacaq.
Bildirilir ki, tamaşaçılara konsertlərin ləğvi ilə bağlı rəsmi bildirişlər göndərilib. Dublin konserti daha əvvəl may ayından sentyabr ayına təxirə salınmışdı.
Təşkilatçılar konsertlərin ləğv edilməsini sənətçinin nəzarətindən kənar baş verən "gözlənilməz hallar"la əlaqələndiriblər. Bununla yanaşı, SHOT-un məlumatına görə, qərarın verilməsinə Oxxxymiron barəsində səsləndirilən uşaq cinsi istismarı ilə bağlı iddiaların təsir göstərdiyi bildirilir.
Qeyd edək ki, bu iddialarla bağlı hələlik rəsmi məhkəmə qərarı və ya hüquq-mühafizə orqanlarının yekun nəticəsi açıqlanmayıb.
Digər Xəbərlər
