İkinci Dünya müharibəsindən qalan sursat zərərsizləşdirildi

Macarıstan Silahlı Qüvvələrinin 1-ci İstehkamçı və Çay Patrul Alayının hərbçiləri Marqit adasının cənub hissəsində Dunay çayından İkinci Dünya müharibəsindən qalmış sursat qalıqlarını çıxarıblar. 

Ajans.az xəbər verir ki, əməliyyatın təhlükəsiz şəkildə həyata keçirilməsi üçün Marqit körpüsü müvəqqəti olaraq hər iki istiqamətdə nəqliyyatın hərəkəti üçün bağlanıb.

Əməliyyatın əvvəlində çayın səthində ehtimal edilən sursatın yalnız kiçik bir hissəsi görünürdü. Buna görə də istehkamçılar bütün mümkün riskləri nəzərə alaraq hazırlıq görüblər. Sursat sudan çıxarıldıqdan sonra müəyyən edilib ki, bu, Marqit körpüsünün orta dayağının yaxınlığında olan 7,5 santimetrlik alman artilleriya mərmisinin gilizidir.

Dunay çayında suyun səviyyəsinin aşağı düşməsi səbəbindən İkinci Dünya müharibəsindən qalmış partlayıcı vasitələrə və sursat qalıqlarına son vaxtlar daha tez-tez rast gəlinir. İyun ayı ərzində Macarıstan Silahlı Qüvvələrinin 1-ci İstehkamçı və Çay Patrul Alayına bu cür təhlükəli sursatlarla bağlı təxminən 170 müraciət daxil olub. Bu müraciətlərin əhəmiyyətli hissəsi su hövzələrində və sahilyanı ərazilərdə aşkar edilən hərbi sursatlarla əlaqədar olub.

Macarıstan Silahlı Qüvvələrinin istehkamçıları keçmiş müharibələrdən qalmış təhlükəli sursatların insanlar üçün risk yaratmaması və ətraf mühitin daha təhlükəsiz olması üçün hər gün öz vəzifələrini yerinə yetirirlər.